راولپنڈی: سابق وزیر داخلہ شیخ رشید احمد کو عمرہ کے لیے سعودی عرب روانگی سے روکنے پر وفاقی حکومت کو عدالت نے نوٹس جاری کر دیا اور ڈی جی ایف آئی اے اور ڈی جی پاسپورٹ کو جواب کے لیے طلب کر لیا۔
میڈیا نیوز کے مطابق، دائر شدہ توہینِ عدالت کی درخواست پر سماعت کے دوران عدالت نے معاملے کی سنگینی کو اجاگر کیا اور فریقین کو نوٹسز جاری کرتے ہوئے اگلی سماعت 18 نومبر تک ملتوی کر دی۔
سماعت کے دوران جسٹس صداقت علی خان نے کہا کہ یہ کیس توہینِ عدالت کے زمرے میں آئے گا اور ذمہ دار شخص کو قانونی سزا یا جزا دی جائے گی۔ عدالت نے استفسار کیا کہ یہ معاملہ سنگل بینچ میں ہونا چاہیے تھا تو ڈویژن بینچ کے سامنے کیسے پیش کیا گیا؟ جس پر عدالت نے ہدایت کی کہ کیس کو دوبارہ سنگل بینچ میں مقرر کیا جائے۔
سماعت کے دوران شیخ رشید احمد بھی کمرہ عدالت میں موجود تھے۔ ان کے وکیل نے مؤقف اختیار کیا کہ عدالت کے واضح حکم کے باوجود ایئرپورٹ پر ایف آئی اے اہلکاروں نے انہیں عمرہ کے لیے جانے سے روکا، جو عدالتی حکم کی کھلی خلاف ورزی اور توہینِ عدالت کے مترادف ہے۔
