جو کچھ ممکن تھا، ایک سال میں کر دکھایا: مراد علی شاہ

سندھ حکومت کی ایک سالہ کارکردگی: مراد علی شاہ کا عزم اور ترقیاتی منصوبے
وزیراعلیٰ سندھ مراد علی شاہ نے کہا ہے کہ موجودہ حکومت نے اپنے ایک سالہ دور میں بھرپور محنت کے ساتھ ممکنہ اقدامات کیے ہیں۔
سندھ حکومت کی سالانہ کارکردگی کے حوالے سے بریفنگ دیتے ہوئے وزیراعلیٰ نے بتایا کہ گزشتہ سال کے دوران متعدد عوامی ترقیاتی منصوبے شروع کیے گئے ہیں اور گورننس کو بہتر بنانے کے لیے ڈیجیٹلائزیشن پر خصوصی توجہ دی گئی ہے۔
انہوں نے بتایا کہ چیئرمین بلاول بھٹو کی قیادت میں “سندھ ہاری کارڈ” کا آغاز کیا گیا، جس کے تحت ایک سال میں 10 ارب روپے کی مالی امداد ایک لاکھ سے زائد ہاریوں تک پہنچائی گئی ہے۔
تعلیمی ترقی کے حوالے سے گفتگو کرتے ہوئے وزیراعلیٰ نے کہا کہ “پیپلز انفارمیشن ٹیکنالوجی پروگرام” کے ذریعے 3 جامعات سے 11,071 طلبہ نے گریجویشن مکمل کیا، جبکہ آئی ٹی سیکٹر میں 3 نئے پورٹلز بھی متعارف کرائے گئے ہیں۔
انہوں نے بتایا کہ سیلاب سے متاثرہ افراد کی بحالی کے لیے “سندھ پیپلز ہاؤسنگ فار فلڈ افیکٹیز” کے تحت جامع منصوبے پر کام جاری ہے۔ کراچی میں بھی مختلف ترقیاتی منصوبے زیر تکمیل ہیں، جبکہ گھوٹکی میں زرعی تحقیقاتی مرکز قائم کیا گیا ہے اور دیہی علاقوں کی ڈرون کے ذریعے ڈیجیٹل میپنگ کی جا رہی ہے۔
مراد علی شاہ نے کہا کہ ہم نے اپنے ایک سالہ دور میں ہر ممکن اقدام کیا ہے اور ہم قائداعظم محمد علی جناح اور ذوالفقار علی بھٹو کے ویژن کو آگے بڑھانے کے لیے پرعزم ہیں۔