بونیر قتل کیس کا ڈراپ سین: منگیتر ہی قاتل نکلی

بونیر کے شہری کے قتل کا معمہ حل، قاتل کوئی اور نہیں بلکہ اس کی اپنی منگیتر نکلی، جس نے ساتھی کی مدد سے ابرار کو راستے سے ہٹانے کا منصوبہ بنایا۔
یہ واقعہ سوشل میڈیا پر وائرل ہونے کے بعد ایس پی کینٹ ڈویژن اعتزاز عارف کی ہدایت پر ڈی ایس پی پشتخرہ سرکل محمد اشفاق خان کی نگرانی میں ایس ایچ او تھانہ تاتارا کیڈٹ قمر شہزاد، تفتیشی افسران اور لیڈیز پولیس پر مشتمل ٹیم نے کارروائی کرتے ہوئے قتل میں ملوث ملزمان کو ایک ہفتے کے اندر گرفتار کرلیا۔
تحقیقات کے دوران مقتول ابرار ولد بہرام کی منگیتر کو شامل تفتیش کیا گیا، جہاں اس کے متضاد بیانات پر مزید پوچھ گچھ کی گئی۔ بالآخر اس نے اعتراف کیا کہ اس نے اپنے ساتھی ظہیر ولد رمیز کے ساتھ مل کر ابرار کو قتل کروایا۔ ملزمہ کے مطابق، اس کے ظہیر کے ساتھ دوستانہ تعلقات تھے اور وہ اس رشتے سے ناخوش تھی۔
پولیس نے ملزم ظہیر کو بھی گرفتار کرلیا، جب کہ آلہ قتل اور واردات میں استعمال ہونے والی گاڑی بھی برآمد کرلی گئی۔ خاتون ملزمہ کو مزید تفتیش کے لیے وومن پولیس اسٹیشن منتقل کر دیا گیا، اور مزید تحقیقات جاری ہیں۔
واقعہ 27 مارچ کو پیش آیا تھا، جب مقتول کے چچا محبت خان نے نامعلوم ملزمان کے خلاف مقدمہ درج کرایا تھا۔ ایس پی کینٹ ڈویژن نے واقعے کا سخت نوٹس لیتے ہوئے خصوصی ٹیم تشکیل دی، جس نے جدید تکنیکی بنیادوں پر تحقیقات کیں اور ملزمان کو بے نقاب کر دیا۔