پنجاب کے ضلع اوکاڑہ میں مچھر سے بچنے کے لیے جلائے گئے اُپلوں سے آگ لگنے کے نتیجے میں 3 کمسن بہن بھائی جھلس کر جاں بحق ہوگئے۔
تفصیلات کے مطابق یہ افسوسناک واقعہ اوکاڑہ کے نواحی علاقے 31 جی ڈی میں پیش آیا۔ پولیس کے مطابق تینوں بچے ایک ہی چارپائی پر سو رہے تھے اور مچھر سے بچاؤ کے لیے انہوں نے چارپائی کے قریب اُپلے جلا دیے تھے۔ اُپلوں کی آگ نے بستر کی چادر کو اپنی لپیٹ میں لے لیا، جس کے سبب تینوں بچے جھلس گئے۔
پولیس نے مزید بتایا کہ آگ کی شدت کے باعث 4 سالہ شیزہ اور 2 سالہ قمر موقع پر ہی جاں بحق ہوگئے، جب کہ 7 سالہ عبداللہ کو تشویشناک حالت میں اسپتال منتقل کیا گیا، لیکن وہ بھی دوران علاج زخموں کی تاب نہ لاتے ہوئے چل بسا۔
