لاہور: لاہور کی عدالت نے پاکستانی یوٹیوبر سعد الرحمان المعروف ڈکی بھائی کو 14 روزہ جوڈیشل ریمانڈ پر جیل بھیج دیا ہے۔ یہ فیصلہ ڈکی بھائی کی جسمانی ریمانڈ میں توسیع کی درخواست کی سماعت کے بعد کیا گیا۔
جوڈیشل مجسٹریٹ نعیم وٹو نے سماعت کے دوران ملزم کی جسمانی ریمانڈ کی استدعا مسترد کر دی۔ نیشنل سائبر کرائم ایجنسی کے اسسٹنٹ ڈائریکٹر شعیب ریاض نے عدالت کو بتایا کہ ملزم سے موبائل فون، ڈیجیٹل اکاؤنٹس کے لنک، لیپ ٹاپ اور کرنسی برآمد کر لی گئی ہے، تاہم مزید شواہد کی برآمدگی متوقع ہے، اس لیے مزید جسمانی ریمانڈ کی درخواست کی گئی تھی۔
ڈکی بھائی کو جوا کھیلنے والی ایپ کو اپنی ویڈیوز میں پروموٹ کرنے کے الزام میں گرفتار کیا گیا۔ انہیں 17 اگست کو لاہور ائیرپورٹ سے گرفتار کیا گیا تھا۔ پولیس کے مطابق ڈکی بھائی نے اپنی ویڈیوز میں مداحوں کو بیٹنگ ایپس میں پیسہ لگانے کی ترغیب دی، جس کے نتیجے میں کئی افراد کو مالی نقصان ہوا۔
