لاہور: ہائی کورٹ نے پی ٹی آئی کے بانی عمران خان کے خلاف 9 مئی کے واقعے سے متعلق 8 مختلف مقدمات میں ضمانت کی درخواستیں مسترد کر دیں۔
جسٹس سید شہباز علی رضوی کی سربراہی میں دو رکنی بینچ نے ضمانت کی درخواستوں پر 7 صفحات پر مشتمل تحریری فیصلہ جاری کیا، جس میں کہا گیا ہے کہ تمام مقدمات ممنوعہ جرائم کی فہرست اور ضابطہ فوجداری کے سیکشن 497 کے تحت آتے ہیں، اور مزید تحقیقات کی ضرورت ہے۔
عدالت نے ٹرائل کورٹ کو ہدایت دی ہے کہ عمران خان کا پولی گرافک، فوٹو گرامیٹک اور وائس میچنگ ٹیسٹ کرایا جائے۔
فیصلے میں مزید کہا گیا کہ ابتدائی تحقیقات میں عمران خان نے مکمل تعاون نہیں کیا اور اس وجہ سے ان کی ضمانت کی درخواستیں مسترد کی جاتی ہیں۔
واضح رہے کہ عمران خان نے جناح ہاؤس پر حملہ کیس سمیت دیگر مقدمات میں ضمانت کے لیے ہائی کورٹ سے رجوع کیا تھا، جبکہ ان کے وکیل بیرسٹر سلمان صفدر عدالت میں پیش ہوئے۔
