سینئر صوبائی وزیر شرجیل انعام میمن نے کہا ہے کہ پیپلز پارٹی عوام کے ساتھ کھڑی ہے نہ کہ شہباز شریف کے ساتھ، اور مسلم لیگ (ن) میں کچھ ایسے لوگ ہیں جو آئین نہیں سمجھتے اور غیر ضروری بیانات دیتے ہیں۔
کراچی میں پریس کانفرنس کرتے ہوئے شرجیل میمن نے کہا کہ پیپلز پارٹی نے قائد عوام شہید ذوالفقار علی بھٹو کی برسی گڑھی خدا بخش میں منائی، جہاں پی پی کے چیئرمین بلاول بھٹو زرداری نے ملک کے موجودہ مسائل پر تفصیل سے بات کی۔ بلاول بھٹو نے سندھ کے کینالز کے مسئلے پر اپنی پالیسی بھی پیش کی اور کہا کہ پیپلز پارٹی عوام کے ساتھ کھڑی ہے، کسی صورت کینالز بننے نہیں دیں گے۔
انہوں نے مزید کہا کہ پیپلز پارٹی نے ہمیشہ صوبوں کے حقوق کی حفاظت کی ہے اور ہر موقع پر اس بات کا اعادہ کیا ہے کہ ہم کسی بھی غیر آئینی فیصلے کو تسلیم نہیں کریں گے۔ بلاول بھٹو نے 18 اپریل کو حیدرآباد میں کینالز اور دہشت گردی کے مسئلے پر ایک تاریخی جلسہ کرنے کا اعلان کیا ہے، جو مخالفین کے لیے ایک بڑا پیغام ہوگا۔
شرجیل انعام میمن نے کہا کہ پیپلز پارٹی نے کبھی بھی کینالز پر سیاست نہیں کی، بلکہ وہ اپنے عوام کے حقوق کی حفاظت کر رہی ہے۔ انہوں نے پنجاب حکومت پر تنقید کرتے ہوئے کہا کہ وزیر اطلاعات عظمی بخاری کی جانب سے دیے گئے بیانات آئین سے لاعلمی کا نتیجہ ہیں، اور پیپلز پارٹی ہمیشہ درست اور وقت پر فیصلے کرنے والی پارٹی رہی ہے۔
وزیر نے کہا کہ پی ٹی آئی نے دہشت گردی کی ترویج کے لیے مدرسوں کو فنڈنگ کی تھی اور طالبان کے دفاتر کھولنے کی بات کی تھی۔ انہوں نے مزید کہا کہ پیپلز پارٹی نے کبھی بھی عوامی مفادات پر سمجھوتہ نہیں کیا اور ہمیشہ اپنے لوگوں کے حقوق کے لیے لڑتی رہی ہے۔
شرجیل میمن نے کہا کہ پیپلز پارٹی کا موقف واضح ہے کہ کینالز پر کسی قسم کا سمجھوتہ نہیں ہوگا، اور وہ اس مسئلے کو ہر فورم پر اٹھا چکے ہیں۔ انہوں نے وزیراعظم سے اپیل کی کہ پاکستان کو مستحکم کرنے کے لیے اقدامات کیے جائیں اور کینالز کے مسئلے کا خاتمہ کیا جائے۔
