راولپنڈی: بانی پی ٹی آئی کی بہن علیمہ خان نے واضح کیا ہے کہ پاکستان تحریک انصاف کے حقیقی چیئرمین صرف عمران خان ہی ہیں۔ انہوں نے کہا کہ اگر کسی کو اس پر شک ہے تو وہ کیا کر سکتی ہے، کیونکہ پارٹی کے تمام احکامات عمران خان ہی دیتے ہیں۔ بیرسٹر گوہر علی خان کو صرف پیغام رسانی کے لیے مقرر کیا گیا ہے۔
اسلام آباد ہائی کورٹ میں میڈیا سے گفتگو کرتے ہوئے علیمہ خان نے خبروں کی تردید کی جن میں کہا گیا تھا کہ عمران خان کی مسلم لیگ ن کے ساتھ کوئی ڈیل زیر غور ہے۔ انہوں نے کہا کہ بانی پی ٹی آئی نے خود اس کی سختی سے تردید کی ہے اور یہ بات سمجھ سے باہر ہے کہ ایسی افواہیں کہاں سے آ رہی ہیں۔
علیمہ خان نے کہا کہ ن لیگ کے ساتھ کوئی بات چیت ممکن نہیں کیونکہ وہی لوگ ہیں جنہوں نے مینڈیٹ چوری کیا تھا۔ عمران خان پنجاب کی جیل میں قید ہیں اور ان کے خلاف تمام ظلم اور مقدمات بھی پنجاب میں ہی لگائے گئے ہیں۔ اس لیے ایسے لوگوں کے ساتھ مذاکرات کا سوال ہی پیدا نہیں ہوتا۔
انہوں نے 26 ویں آئینی ترمیم کو بھی تنقید کا نشانہ بنایا اور کہا کہ یہی ترمیم انصاف کے حصول میں رکاوٹ بنی ہوئی ہے۔ ججز کا اختیار اس ترمیم کی وجہ سے محدود ہو گیا ہے اور عوام چاہتے ہیں کہ اسے فوری طور پر ختم کیا جائے تاکہ ملک کو صحیح راستے پر لایا جا سکے۔
علیمہ خان نے کہا کہ جان بوجھ کر ایک ہی دن میں متعدد مقدمات لگائے جاتے ہیں تاکہ پارٹی کارکنان مایوس ہو کر پیچھے ہٹ جائیں۔ انہوں نے کہا کہ بیرسٹر گوہر علی خان کو صرف رابطے کا کردار دیا گیا ہے اور پارٹی کی قیادت مکمل طور پر عمران خان کے پاس ہے۔
