افغانستان کے صوبہ کنڑ میں رات دیر گئے آنے والے زلزلے نے شدید تباہی مچادی۔ ابتدائی اطلاعات کے مطابق اب تک 250 افراد ہلاک اور 500 سے زائد زخمی ہوچکے ہیں۔
افغان میڈیا کے مطابق زلزلے کا مرکز جلال آباد شہر کے قریب 8 کلومیٹر زیرِ زمین تھا، جس کی شدت 6 ریکارڈ کی گئی۔ زلزلے کے بعد پانچ مزید آفٹر شاکس بھی محسوس کیے گئے جن کی شدت 4.3 سے 5.2 تک رہی۔
قدرتی آفات کے افغان ادارے کے مطابق سب سے زیادہ نقصان نورگل، سواکئی، واٹاپور، منوگی اور چپہ درہ اضلاع میں ہوا، جہاں کئی گاؤں مکمل طور پر مٹی تلے دب گئے۔ خدشہ ظاہر کیا جا رہا ہے کہ ابھی بھی سیکڑوں لوگ ملبے میں پھنسے ہوئے ہیں۔
امدادی ٹیمیں موقع پر پہنچ گئی ہیں اور زخمیوں کو ہیلی کاپٹر کے ذریعے ننگرہار ریجنل اسپتال منتقل کیا جا رہا ہے۔ اسلامی امارت افغانستان کے ترجمان ذبیح اللہ مجاہد نے حکام کو ہدایت دی ہے کہ متاثرین کی جانیں بچانے کے لیے اپنی تمام صلاحیتیں استعمال کریں۔
زلزلے کے جھٹکے ننگرہار، لغمان، کابل اور پاکستان کے خیبر پختونخوا کے بعض علاقوں میں بھی محسوس کیے گئے۔
